歐聯外圍賽第三圈首回合，英超阿仙奴作客撲擊荷蘭川迪，波童捧1.55倍客W。阿仙奴過去兩季第三圈外圍賽四戰全勝，經驗豐富見慣大場面，川迪歐洲賽經驗幼嫩，新練麥卡倫以往執米杜士堡時遇上雲格亦輸多贏少，兵工廠勝望極濃。（now 632周四凌晨2時45分直播）
今年係阿仙奴連續第三季要踢歐聯外圍賽第三圈，由於勝負關係到球隊今季收入，所以佢每次備戰都好認真，之前阿仙奴酋長盃同阿積士四角賽表現唔錯，除艾迪巴約踢出身價，一眾小將卡路士韋拿、艾朗藍斯亦成功上位，令雲格手上兵源更加充裕。唔好以為今場係首回合佢就會留力，睇番過去兩季，阿仙奴都能夠首回合作客情況下擊敗薩格勒布戴拿模及布拉格斯巴達，次回合亦能於主場贏波，四戰全勝冇流攤，證明佢唔會輕敵，心理質素極佳。
川迪頭冇料到
川迪上季附加賽爆冷擊敗阿積士取得一張歐聯入場券，可惜練魯頓及中場靈魂安格拿今季齊齊過檔史浩克04，士氣及實力均受損，今季接掌前英格蘭領隊麥卡倫有幾多料雲格最清楚，因為麥卡倫以往執米杜士堡時遇上阿仙奴都冇運行，唔計次一等英格蘭聯賽盃，麥卡倫十二次對賽入面輸足十一次，擺明畀雲格恰死，今次帶領中型班川迪想爆冷一都唔容易，1.55倍客W可放心捧場。