「盃賽王」利物浦今晚歐聯第三圈外圍賽首回合作客標準列治，淨係恃住「歐聯專家」大名都夠照，何況佢有新兵羅比堅尼歐聯初體驗，必定搏老命，由佢拍住費蘭度托利斯強力前鋒組合，紅軍今場要開客勝冇難度呀！（有線61周四凌晨3:05直播）
紅軍今年夏天增兵質量兼備，最令我欣賞自然係上季由「費托」一個打晒前鋒線，今季會有熱刺踢得好掂愛爾蘭射手羅比堅尼加盟幫手，兩個都係速度、射術一流勤力射手，夾埋一齊威力何止倍增。更重要係，原來今場賽事只係羅比堅尼咁大個仔第一次踢歐聯，落到場肯跑多幾步製造空位，標準列治班守將點頂得佢住？
標準列治易帥影響大
翻查紅軍歷來踢歐聯外圍賽歷史，之前五次都係全部能夠晉級，未試過甩拖，擺明係實力遠勝其他二流聯賽冠軍球隊。就以佢近七次外圍賽客戰為例，結果就有六場贏出，合共入十八球僅失三球，有咁強數據支持，就算話隊長謝拉特因傷上陣機會五五波，馬斯真蘭奴、賴恩巴布同盧卡斯都要踢奧運會缺陣，人才濟濟紅軍都係勝利在望啦！
標準列治呢邊，比利時聯賽冠軍都搵唔到個世界級球星飛，隊波暑假又換新練保路尼執，影響唔細。佢增兵最叻係搵到個上季踢紐倫堡克羅地亞前鋒賓高，又係實力有限，今晚主場都信唔過呀！