蘇超首輪賽事壓軸戰，由升班馬咸美頓主場迎戰登地聯。咸美頓上季以主場不敗佳績升班，今季保留原班人馬應戰，相信會有一番作為；反觀登地聯大換血後，未必可保持上季水平，今仗作客仲要讓平半，樂比仔建議捧咸美頓下盤。（周二凌晨2時45分開賽）
蘇超多年來均由些路迪同格拉斯哥流浪獨大，其他球隊實力接近，即使排名較高球隊，都冇贏波把握，故作客讓波可謂充滿暗湧，尤其係咸美頓上季蘇甲超晒班，實力唔會差得過蘇超球隊，登地聯今仗作客新道格拉斯公園球場，樂比仔認為充滿危機。
登地聯大換血靠唔住
事實上，咸美頓係今季蘇超黑馬，除保留上季升班功臣，仲羅致多名好手加盟，實力有增無減，加上佢主場氣勢強勁，上季聯賽創出主場不敗佳績，可見係典型地頭蟲。由於球場面積較窄，而且僅容納六千人，踢慣大場登地聯，隨時唔適應。
登地聯流失唔少主力，上季首席射手路爾亨特剛被英冠球會雷丁挖角，次席射手巴利笠臣亦年頭過檔些路迪，冇兩大射手登地聯，入球能力必然大受影響，對住咸美頓都未必惡出樣。
雖然登地聯今季亦補充多名新球員，但從熱身賽所見，新球員表現只係一般；領隊拿維連見唔對路，立即從新特蘭簽奧當路雲，不過球隊又受到傷兵困擾，格力干維及基夫屈臣均因傷缺陣，登地聯陣容一下子轉變咁大，首仗大有機會失分