唔經唔覺，韓職已踏入第十三周，裴洪智今日有場好畀大家，就係光州尚武對大田市民，平手盤要客隊。雖然光州尚武叫做「不死鳥」，但其實佢係海產至真，近三季都韓職包尾，仲唔係頂級魚腩！今日碰上近年穩紮穩打大田市民，實力已差一大截，再加上今季「不死鳥」彈起金明中已經「揚晒」，市民一定有防範，相信主隊惡唔出樣。（周日下午6時開賽）
尚武全韓班好打有限
位於南韓南部光州尚武，香港球迷未必太熟悉，但其實佢情況有似香港08或者華家堡冇外援，靠年輕球員搵食。所以，稍有球員踢得兩嘴，就會被大球會擸走。已經連續三季包尾光州尚武，今季繼續以全韓班應戰，結果當然係送死居多，現時十二場聯賽中僅得兩勝，其中一勝更係要分心亞冠盃全南天龍，而近期聯賽亦已五連敗，可見狀態、實力兩者都曳。
雖然大田市民開季戰績亦唔好，但球隊近期已逐漸上番軌道，聯賽近四戰保不敗之餘，今季重金禮聘尼日利亞射手艾歷奧賓拿亦會復出，主隊肯定有排煩。再睇埋往績，兩軍近六次對碰之中，大田市民獲得四勝一和一負，佔盡優勢，今場客隊唔使讓波抵捧。