[东方日报]「阿伯」臨場應變差

人才濟濟、小組進攻絲絲入扣、鋒線威力驚人，以上三個西班牙分組賽表現出優點，到淘汰賽對住意大利，竟然全部消失。領隊阿拉干利斯苦戰期間完全唔見適當變陣應對，隨時會令佢對住戰術大師希丁克落入下風。


兩閘過分進取存危機


雖然話意大利防守厲害，但以意軍當日殘陣，依然令「鬥牛國」落得要靠外圍遠射偷襲，僅靠互射十二碼晉級。射手費蘭度托利斯、韋拿表現沉寂，今晚遇上脫胎換骨俄羅斯，仲可唔可以繼分組賽大勝四比一後再贏一鋪，恐怕唔易。
門將卡斯拿斯雖然有「神」一般身手，但球隊左右閘過於進取助攻踢法，卻可能令球隊面對對方快速反擊危機。
正選陣容變化唔大，「阿伯」對麾下一班戰將信賴有加，不過一旦韋拿同「費托」搵唔到破關之法，「阿伯」臨場應變將備受考驗。


一個機會前鋒質素見底


同樣都係身高手長、同樣係球隊攻擊核心，但係西班牙費蘭度托利斯就專門為隊友製造機會，而俄羅斯柏夫里約真高就專門浪隊友為佢製造機會，激死！
俄羅斯雖成功殺入四強，但分組賽頭兩場演出並唔係咁好，原因好多人會認為係因為艾沙維停賽，其實柏夫里約真高唔到飛先係主因。決賽周開鑼前，好多傳媒都唱到呢個俄羅斯前鋒有幾勁，仲話好多歐洲球會想打佢主意，搞到我對佢都有期待。整鬼起腳係多呀，但中龍比率都低到爆，面對空門都夠膽死射出界，表現完全名不副實，好失望。若果唔係佢拍檔艾沙維第三場對瑞典生死戰復出，俄羅斯都唔知出唔出到線呀！佢家陣有三個波入到，好快去還神啦！


費托顯功架 柏夫里敗家


至於入得一球費蘭度托利斯，係就係入波少過柏夫里約真高，風頭亦完全畀佢隊友韋拿所蓋，但係從來唔會有人覺得佢廢。佢就算冇波入都好，憑住佢不斷走動同埋鑽營，都會為其他隊友製造到空位、甚至埋門機會。如果唔係「費托」樹大招風，韋拿又點會有咁多表演機會呢？如果韋拿最後真係做得成神射手，佢真係要請「費托」擦餐勁。