堂堂奪標大熱門德國，竟然淪落到要B組最後一場分組賽踢出線生死戰，火併主辦國之一奧地利，德國領隊勒夫話到明今仗唔止要出線，仲要省番靚德國個金漆招牌。根據勒夫所講，德國會變陣大打快波，用快打旋風摧毀奧地利出線美夢，捧「讓球客勝」啦！
寄望維也納奇好過靠前鋒
大難不死必有後福？上仗補時階段憑個問題十二碼取回一分，保住主辦國出線唯一希望奧地利，今晚對住德國，就只有贏波先有出線希望，雖然話佢鬥志十足，但以佢世界排名九十二低位實力，又真係可以砌低排第五德國咩？
欠臨門一腳
奧地利報章連日都以「維也納奇」為主題，期望今晚擊敗德國出線，佢不斷提及曾經七八年世盃擊敗前西德經典，不過講咁多，無非係國家隊唔掂，要靠奇囉！事實上，佢兩戰唯一入波，就係靠個問題十二碼，上仗對住波蘭，前段三、四個單刀機會都唔識入，正如佢領隊希根斯貝加所講，奧地利具天分球員唔少，但臨門一腳確實有待改善。
EuRo莊水機
奧勝 和 德勝
歐平 8.73 4.22 1.37
illiam Hill 9.00 4.50 1.36
Ladbrokes 8.00 4.00 1.33
足智彩 7.00 4.10 1.38
註：藍字為高於歐平，紅字則低於歐平。
德國有心有力大勝可期
德國分組賽兩戰得三分，今仗和波都出到線，不過來自國內外壓力唔小，班球員肯定會搏命入多幾粒，贏番場漂亮勝仗。反觀東道主奧地利想搏都有心無力，睇番兩班波今年二月曾經交過手，德國踢得好曳都照數對手三球，實力上明顯大有距離，加埋德國今場求勝決心強，冇得再諗要畀面主辦國，客隊大捷可期，2.1倍「讓球客勝」諗得過。
德國執番正唔再失拖
廣州呢幾日一時出猛太陽，但係又突然傾盆大雨，正所謂天有不測之風雲，勢估唔到連一向穩穩陣陣德國都會魚翅變粉絲，依家被迫到懸崖邊，球員醒醒定定對住實力差幾皮奧地利，唔會再失拖喇！
德國輸畀克羅地亞最關鍵原因係心態，真係諗極都唔明點解短短兩三日之間，球員狀態落差咁大，冇晒對比賽應有正確態度同爭勝心，所以成隊波根本冇辦法正常運作。但足球比賽奧妙之處就係咁，呢場踢唔起，下場又可以變番龍精虎猛，只要德國擺番正心態，要擊敗實力差好多奧地利唔會難。
奧地利憑十二碼踢和波蘭凸顯東道主優勢，亦再次為奧地利永不放棄精神而鼓掌，要記住幸運之神特別眷顧努力奮鬥球隊。但奧地利始終缺乏臨門一腳兼踢法粗糙，除非德國全線崩潰，否則難逃一敗。
踢到曉飛克羅地亞，瓦解德國逼搶同圍攻，重現外圍賽兩勝英格蘭最佳狀態，八強賽對實力一般捷克或者土耳其都冇有怕，呢場對波蘭例行公事，為留力梗係唔會去盡，但亦唔想輸打擊士氣，和波最合理。數字上仲有出線可能波蘭，唔單止戰術比較呆板，中後場攻守節奏好唔協調，即使對住唔係「夫添」克羅地亞都冇贏波把握。
普多斯基Fit爆入波唔難
現時德國隊中邊個球員最弗？梗係普多斯基啦！兩仗射入三球呢個數據足以反映一切，最重要係今場對手奧地利兩場分組賽都係先入波一隊，後防咁渣，普多斯基大把機會搵食，實在係首名入球心水，另外隊長波歷克亦可作副選。至於克羅地亞對波蘭一仗，首名入球可以揀格仔兵團奧歷，話晒佢都開齋，順起上整多粒唔奇。再唔係話，有遠射能力拿傑迪錫都可以諗！
要補鑊冇面畀
德國喪轟奧地利
歐國盃B組分組賽最後兩仗今晚同時上演，不過只要德國唔輸畀奧地利，另一場波蘭對克羅地亞將會變成例行公事，由於同奧地利實力差距懸殊，德國以小組次名出線基本上問題不大，經過上仗對克羅地亞差劣表現，球隊上下都希望以一場漂亮勝仗挽回顏面，加強半準決賽出戰葡萄牙信心，黑柴唔擔心德國唔搏命，推介有2.1倍「讓球客勝」。（now 632周二凌晨2時45分直播）
德國上仗被一致睇好下以一比二輸畀克羅地亞，將首名出線資格拱手讓人，的確面目無光，雖然話上場克羅地亞表現脫胎換骨，但實際上德國擊敗波蘭之後，心態過於鬆散，整體表現大為走樣，輸波同輕敵有關。
勒夫熟透對手
經過呢場敗仗，德國當然會打醒精神，佢實力固然高奧地利兩班，球隊體力化踢法亦係奧地利剋星，兩軍過去四度交鋒，德國取得全勝，攻入十七球只失四球，雙方最近一次交手係今年二月熱身賽，結果德國憑下半場連入三球淨勝對手。
德國領隊勒夫過去奧地利聯賽執多年，先後過因斯布魯克同埋奧地利維也納，對呢支鄰國球隊實力瞭如指掌，今仗德國雖然有中場舒韋恩史迪加停賽，左閘馬素贊臣因傷缺陣，但兩人重要性有限，只要隊長波歷克能夠及時回復水準，依然可以睇高一線。
奧軍把握力差
奧地利可以話係今屆歐國盃十六強中最弱一隊，雖然過去兩場分組賽表現有相當進步，上仗開賽初段更一度壓住波蘭打，不過球隊質素有限，始終把握唔到入球機會，落後一球下，去到完場前靠一個問題十二碼追和，到今屆分組賽第一分，多少都係靠球證同運氣幫忙，賽後全隊上下都話心滿意足，佢目前心態放鬆，要爭出線今仗又唔可以主守，相信會畀到更多空間德國發揮，黑柴相信德國今仗起碼可以贏兩球或以上。