德國入“土”為安
休息兩日之後，歐洲盃四強今晚再度開戰，上仗清脆利落淘汰熱門葡萄牙的德國，遇上二千年世界盃季軍土耳其，形勢上絕對佔優，因為土軍連場硬仗令到球員出現傷病、停賽及體能上影響，再要創造更佳成績確係比較困難，所以初盤開出德國讓一球係非常正路，以德國殺敗葡萄牙一仗的表現，今晚應可在九十分鐘內絕殺對手，一於博德軍可以淨勝兩球。
話咗德國係大賽高手一啲冇錯，任你葡萄牙點樣有氣勢，點樣有銳利進攻，德國依然踢出穩打穩紮的風格，全場在領先優勢下打出部署，基本上一支球隊在落後情況下要反勝德國機會好微。另外，布歷克、舒雲斯迪加、普度斯基、馬迪薩卡及門將列文等已經完全上力，憑整體實力比較，德國始終都在土耳其之上，打入決賽攞埋冠軍，每個球員淨袋廿五萬歐元巨額奬金，今晚點會唔搏。
有“後上王”之稱的土耳其殺到入四強，其實已經功德圓滿，當然，入決賽唔係冇可能，但以今仗的人腳向德國挑戰，實在難以睇好，辛尼、杜蘭、阿斯克及門將迪美爾停賽，射手尼赫特、中場比路素古、美田等都因傷缺陣，前、中、後三線都天殘地缺，即使要同德國搏命，都火力不足，唯有講句醫生口頭禪“盡人事”，又或者等“運”到。
推介：德國 2:0