克羅地亞在分組賽三場全勝，唔單止顯示出黑馬本色，而且更以首名出線，可以避開實力較強的葡萄牙，八強對手係土耳其，晉級機會大增，唔係話土耳其實力弱，只不過克羅地亞實力較為平均，踢法上比土耳其更悅目，更有組織性，所以捧克羅地亞相當正路，初盤開出克羅地亞要讓平手/半球，睇高克羅地亞都係呢個原因。
“格仔兵團”陣中擁有唔少高質球員，包括新星摩特歷、卡蘭積卡、柏拉積及拿傑迪等，表現一場比一場好，前鋒線更有多產射手卡拉斯歷，而柏特歷亦功架十足，中前場的進攻能力一定比土耳其優勝，其實講到踢法上兩隊都比較相似，同樣以地面組織為主，盡量以個人技術控制比賽速度及節奏，呢方面，克羅地亞比土耳其做得更好。
另外，克羅地亞比較着數係休息時間多一日，而且第三場更收起多名主力，體能上有一定優勢，鬥攻鬥搶以快打快，土耳其一定輸蝕，始終搏完一場捷克，球員付出體力唔少，今晚再戰九十分鐘，的確唔係咁易捱。土耳其對捷克能夠大逆轉，反勝對手打入八強，其實都已經“賺”咗，但值得一讚係一班球員的鬥志及拼勁，入到八強總算係回報，當然，入四強機會仍在，但講到中前場入球能力始終唔及對手把握性強，寄望運氣可以持續。
推介：克羅地亞 2：1